Ўзгидромет: Тошкентда ҳаво сифати ёмонлашиши бир неча кун давом этади

Кеча, 16 ноябрь куни соат 20:00 ҳолатига кўра, Тошкент шаҳри атмосфера ҳавосида майда дисперс заррачалар миқдори меъёрдан бир неча баробар ошган.

PM10 373 мкг/м3 ни ташкил этди, бу рухсат этилган максимал концентрациядан 1,2 баравар (300 мкг/м3), PM2,5 202 мкг/м3 ни ташкил этди, бу рухсат этилган максимал концентрациядан 3,4 баравар (60 мкг/м3) ошди.

Қайд этилишича, ҳароратнинг ўзгариши ҳам кўрсаткичларнинг ошишига ёрдам берган.

Ҳароратнинг кескин ўзгариши инверсия жараёнини юзага келтиради, бу жараёнда атмосферадаги майда дисперс заррачалар чўкади ва уларнинг миқдорий кўрсаткичлари ортади.

"Бундай об-ҳаво шароити республикамизнинг барча ҳудудларида яна бир неча кун сақланиб туради. Республикамиз фуқаролари ва чет эллик меҳмонлардан эҳтиёт чораларини кўришларини сўраймиз," - дея огоҳлантирди синоптиклар.

Фуқароларга очиқ ҳавода камроқ бўлиш ва кўчага чиққанда ниқоб тақиш тавсия этилади.

IQAir портали маълумотларига кўра, соат 08:00 ҳолатига кўра, Тошкент ҳавосининг AQI кўрсаткичи 173 ни ташкил этди, ҳаво сифати зарарли деб таснифланади. PM2.5 концентрацияси ЖССТ томонидан тавсия этилган меъёрнинг ўртача йиллик қийматидан 17,3 баравар юқори.