Адлия вазирлиги "Давлат божи тўғрисида"ги қонунга ўзгартиш ва қўшимчалар киритиш тўғрисидаги қонун лойиҳасини халқ муҳокамасига қўйди.
Лойиҳада давлат божи ставкаларини унификация қилиш, оптималлаштириш ва камайтириш таклиф этилмоқда.
Ҳужжатга кўра, Тошкент, Нукус шаҳарлари ва вилоятлар марказларида жойлашган кўчмас мулкни бошқа шахсга номига расмийлаштириш учун давлат божи 1,5 БҲМ (405 минг сўм)ни ташкил этади.
Эндиликда кўчмас мулкнинг умумий майдонига қараб давлат божи 3 БҲМ (810 минг сўм)га етди.
Автотранспорт воситаларини бошқа шахсга ўтказиш тўғрисидаги шартномаларни сертификатлаш учун 3 БҲМ (810 минг сўм) миқдорида давлат божи ундирилиши белгиланди.
Эндиликда автомобилнинг ишлаб чиқарилган санаси ва двигатель қувватига қараб, давлат божи 2 дан 10 БҲМгача (540 минг сўмдан 2,7 миллион сўмгача) ўзгаради.
Автотранспорт воситалари, моторли аравачалар ва моторли қайиқларни ўтказиш учун БҲМнинг 50 фоизи (135 минг сўм) миқдорида давлат божи белгиланади. Амалдаги таҳрирда давлат божи ставкаси ишлаб чиқарилган санага қараб БҲМнинг 10 дан 50 фоизигача (27 минг сўмдан 135 минг сўмгача) ўзгаради.
Лойиҳа муҳокамаси 16 декабрга қадар давом этади.
