Украинадан эвакуация қилинган Ўзбекистон фуқароларини олиб келиш учун Тошкентдан Польшага иккинчи махсус самолёт учди. Бу ҳақда “Дунё” АА хабар берди.
Самолёт Тошкент вақти билан 21:00 атрофида Польшага етиб келиши кутилмоқда.
Ўзбекистоннинг Киевдаги элчихонаси маълумотларига кўра, фуқароларни Львов шаҳридан “Катовице” назорат-ўтказиш пунктигача етказишни тезлаштириш мақсадида 7 та автобус ижарага олинган.
Шу билан бирга, Ўзбекистон фуқаролари ўз ватанларига уюшқоқлик билан жўнаб кетиш учун Украинанинг Львов шаҳрида қолишда давом этмоқда.
Эслатиб ўтамиз, аввалроқ, Катовице (Польша) аэропортига Украинадан эвакуация қилинган Ўзбекистон фуқароларини олиб чиқиш учун биринчи махсус рейс жўнаб кетгани ҳақида хабар бергандик.
