Судда маълум қилинишича, судланувчи анча вақтдан бери ишқий муносабатда бўлиб келган қизига қўнғироқ қилганида жавоб бермагани сабаб у билан кўриши мақсадида у ишлайдиган деҳқон бозорига борган.
У деҳқон бозорида севган қизи ва унинг сингиллари билан тортишиб турган вақтида қизнинг бошқа бир эркак таниши келиб, тортишувга аралашган.
Шундан сўнг, икки эркак ўртасида муштлашув содир бўлиб, судланувчи ёнида бўлган ошхона пичоғи билан эркакнинг кўкрак ва қорин қисмига бир неча маротаба уриб, уни қасддан ўлдирган.
Бундан ташқари, у пичоқ билан ишқий муносабатда бўлган қизининг ҳам кўкрак қисми, ўнг елка ва билак соҳаларига бир неча маротаба уриб, қасддан соғлигининг қисқа муддатга бузилишига олиб келган енгил тан жароҳати етказган.
Суд судланувчининг қилган ишини суд кўриб чиқилиб, ҳукм эълон қилди.
Унга кўра, ЖКнинг 97-моддаси (қасддан одам ўлдириш) 2-қисми “л” банди ва 109-моддаси (қасддан баданга енгил шикаст етказиш) 2-қисмида назарда тутилган жиноятларни содир этганликда айбли деб топилиб, 15 йил 2 ой муддатга озодликдан маҳрум қилиш жазоси тайинланди.
