Аввалроқ, ижтимоий тармоқларда Lacetti бир эркакни судраб кетгани акс этган видеолавҳа тарқалди. Қашқадарё ИИБ Матбуот хизмати ҳоалт юзасидан маълумот берди.
Аниқланишича, 2022 йил 8 март куни соат 08:00 ларда Қамаши тумани “Бадахшон” МФЙда яшовчи Х.А. Lacetti’да Қамаши деҳқон бозори ёнидан ўтган кўчадан “Ҳунарманд” савдо мажмуаси томон ҳаракатланиб бориб, йўл четида тўхтаб турган Damas’нинг эшик қисмига урилган.
Шундан сўнг, Damas ҳайдовчиси Ҳ.С. Lacetti ҳайдовчиси Х.А.га нима сабабдан машинасига келиб урилгани сабабини сўраган.
Ўзаро тортишувдан сўнг, Damas ҳайдовчиси Ҳ.С. Х.А. бошқарувидаги Lacetti’нинг эшигини ёпганда эгнидаги чопони машинанинг эшигига кириб қолган.
Бундан бехабар ҳайдовчи Х.А. Lacetti’ни юргизиб кетиб, бироз масофагача Ҳ.С.ни чопони билан тортиб кетган. Натижада, Х.А. автомашинани тўхтатишда шошиб қолиб, йўлнинг ўнг томон қисмидан ҳаракатланиб кетаётган иккита Damas’ни орқа ва ён томонларига урилган.
Мазкур ҳолат юзасидан ҳайдовчи Х.А.нинг ҳаракатларида МЖтКнинг 128-моддаси 1-қисмида назарда тутилган ҳуқуқбузарлик аломатлари кўринганлиги сабабли маъмурий тартибда чора кўриш учун тўпланган ҳужжатлар туман ИИБ ЙҲХБга ўтказилган.
