“Фарғона нефтни қайта ишлаш заводи” МЧЖ устав фондидаги “UzAssets”нинг 100 фоиз улуши “Sanoat Energetika Guruhi” МЧЖ ХКга $100 миллионга сотилaди. Бу ҳақда Давлат активларини бошқариш агентлиги Матбуот хизмати хабар қилди.
Битим доирасида Харидор заводни модернизация қилиш, шунингдек, замонавий ва экологик тоза бензин, Евро-5 талабларига жавоб берадиган дизел ёқилғиси;
- Жет а-1 реактив ёқилғиси; суюлтирилган табиий газ ишлаб чиқаришни кўпайтириш;
- нефт агрегатларини модернизация қилиш, шунингдек, ишлаб чиқариш қувватини камида 2 миллион тоннага оширишни таъминлашни ташкил этиш учун $380 миллиондан ортиқ инвестиция мажбуриятларини бажаришни ўз зиммасига олади.
Маълумот учун, завод, мамлакатдаги дастлабки ишлаб чиқариш қуввати 6,5 миллион тоннани ташкил этадиган энг йирик нефтни қайта ишлаш заводларидан бири ҳисобланади. Ўтган 20 йил давомида заводда модернизация ва реконструкция ишлари амалга оширилмаган.
Заводнинг тўлиқ ишлаши учун асосий қийинчиликлардан бири бу Ўзбекистон ҳудудида хом ашёнинг етишмаслигидир. COVID-19 пандемияси корхонанинг молиявий фаолиятига ҳам салбий таъсир кўрсатиб, нефт таъминотининг етишмаслигини оширди ҳамда нефт маҳсулотларига талабни камайтирди. Сўнгги 10 йил ичида йилига ўртача 1-1,5 млн тонна нефт қайта ишланган. Мисол учун 2020 йилда атиги 900 минг тонна хом ашё қайта ишланган холос.
Қайд этилишича, корхонада асбоб-ускуналарнинг маънавий ва жисмоний эскирганлиги ишлаб чиқарилган нефт маҳсулотлари таннархининг кўтарилишига олиб келган. Натижада, ФНҚИЗ маҳсулотлари бозорнинг бошқа иштирокчилари билан рақобатлаша олмайди, бу эса паст рентабелликка, шунингдек маҳсулот сифатининг пасайишига олиб келади.
- Олинган таклифларни ўрганиш натижаларини ҳисобга олган ҳолда, ҳамда:
- белгиланган малака талабларига мувофиқлиги;
- ҳудуд нефт ва газ саноатидаги катта тажрибаси;
- завод фаолияти учун зарур бўлган хом ашё конларининг мавжудлиги;
- корхонанинг баҳосидан юқори сотиб олиш нархини тақдим этгани сабабли “Sanoat Energetika Guruhi” МЧЖ ХК компанияси очиқ савдо жараёни натижалари ғолиби сифатида танланди.
“Sanoat Energetika Guruhi” МЧЖ ХК Ўзбекистондаги энг йирик хусусий вертикал интеграциялашган нефт ва газ компанияси ҳисобланади. Айни пайтда компания ер қаъридан фойдаланиш ҳуқуқига эга бўлган 103 та конга эгалик қилади ва нефт қазиб олишнинг тахминан 80 фоизини ва тасдиқланган газ захираларининг тахминан 22 фоизини ташкил қилади.
Шунингдек, нефт ва газ қазиб олишдан ташқари, компания бензин, дизел, нефт, авиация керосини ва бошқа бир қатор юқори қўшилган қийматга эга маҳсулотлар ишлаб чиқаради. Корхона Ўзбекистондаги стратегик лойиҳаларда, жумладан, нефт қазиб олишни кўпайтириш лойиҳаларида иштирок этади.
