Новосибирсклик уч шифокорга Ўзбекистон президенти томонидан таъсис этилган “Меҳр-саховат” кўкрак нишони топширилди. Бу ҳақда Новосибирск вилояти ҳукумати Матбуот хизмати хабар берди.
Ўзбекистоннинг Новосибирскдаги Бош консули Юсуп Қобулжонов иштирокида мукофотларни тантанали топшириш маросими ўтказилди.
“Меҳр-саховат” кўкрак нишони Новосибирск вилояти давлат клиник шифохонаси бош шифокори Анатолий Юданов, Академик Мешалкин номидаги миллий тиббиёт тадқиқот маркази директори Александр Чернявский ва Новосибирск травмотология ва ортопедия бўйича илмий-тадқиқот маркази мутахассиси, тиббиёт фанлари доктори Валерий Прохоренкога берилди.
Эслатиб ўтамиз, ушбу кўкрак нишони коронавирус пандемияси даврида, шунингдек, турли табиий офатлар, фавқулодда ҳолатлар туфайли хавф-хатарларга қарши курашда, уларнинг оқибатларини бартараф этишда мардлик ва жасорат намунасини кўрсатганларга топширилади.
