Жорий йилнинг 19 апрель куни Жиззах вилояти Зарбдор тумани Оқбулоқ маҳалласида яшовчи эркакни Зомин туманида яшовчи шахс ўзаро келишмовчилик сабабли пичоқлаб, воқеа содир бўлган жойдан яширинган. Орадан кўп ўтмасдан жабрланувчи шифохонада вафот этди, дея хабар бермоқда Жиззах вилояти ИИБ Матбуот хизмати.
ИИО ходимлари томонидан гумонланувчини қидириб топиш чоралари кўрилди. Мазкур қотилликни содир этганликда гумонланган эркак турмуш ўртоғига қўнғироқ қилгани аниқланди.
ИИО ходимлари қўнғироқ қилинган рақам билан боғланишди. Аниқланишича, гумондор университет талабасининг қўл телефонидан аёлига қўнғироқ қилиб, унга қотиллик содир этганлигини маълум қилган. Шундан сўнг ходимлар гумондорни қўлга олинишида унинг ортидан кузатиб боришни талабадан сўраган.
"Кўчада кетаётганимда бир фуқаро менинг телефонимдан фойдаланиб олишимни сўради. У турмуш ўртоғига телефон қилиб, жиноят содир этганлигини ва жабрланувчининг аҳволи қандай эканлигини сўради.
Орадан 10 дақиқа ўтгач ИИО ходимлари менга қўнғироқ қилиб жиноят содир этилганлигини ҳамда ўша инсон қотилликда гумонланаётганлигини айтиб унинг изидан кузатишимни сўрашди. Гумондорнинг ортидан кузатиб бордим ва Тошкент шаҳар ИИО ходимлари томонидан жиноятни содир этишда гумонланган шахс қўлга олинди", - деди талаба.
Гумонланувчининг қўлга олинишида ёрдам берган талаба эсдалик қўл соати ва 5 млн сўм билан тақдирланди ҳамда унинг ота-онасига ташаккурнома топширилди.