АҚШ президенти Дональд Трамп бошқа давлатлар, жумладан, Ўзбекистон маҳсулотларига янги божлар жорий этилишини маълум қилди.
Янги "кўзгу" тарифлар шундай ҳисоблаб чиқилганки, бож у ёки бу мамлакат АҚШдан келтирилган товарларга нисбатан белгилаган бождан икки баравар кам бўлган.
"Бир неча дақиқадан сўнг мен бутун дунё мамлакатларига нисбатан ўзаро тарифларни жорий этиш тўғрисидаги тарихий фармонни имзолайман. Ўзаро - бу улар биз билан шундай қилишади, биз улар билан шундай қиламиз дегани. Жуда осон. Бундан осони йўқ. Менимча, бу Америка тарихидаги энг муҳим кунлардан бири. Бу бизнинг иқтисодий мустақиллик декларациямиздир.
Кўп йиллар давомида Американинг меҳнаткаш фуқаролари четда қолишга мажбур бўлишди, бошқа мамлакатлар эса бой ва қудратли бўлишди - кўп жиҳатдан бизнинг ҳисобимиздан. Аммо энди бизнинг навбатимиз гуллаб-яшнаш ва шу тариқа триллион-триллион долларларни солиқларни камайтириш ва давлат қарзини тўлаш учун ишлатиш," - деди Дональд Трамп.
5 апрелдан базавий божхона божининг энг кам миқдори 10 фоиз миқдорида кучга киради, 9 апрелдан қолган тарифлар амал қила бошлайди.
Ўзбекистон, Қирғизистон, Туркманистон ва Тожикистонга нисбатан 10 фоизлик божлар жорий этилди. Қозоғистон товарларига 27 фоиз миқдорида божлар жорий этилди.
Шу билан бирга, Дональд Трамп, агар бошқа давлатлар жавоб чораларини жорий этса ёки АҚШда ишлаб чиқариш қувватлари ва ишлаб чиқариш ҳажми пасайишда давом этса, тарифлар миқдори ва уларнинг қўлланилиш соҳасини ўзгартириш ҳуқуқини ўзида сақлаб қолишини айтди.