Абдулла Авлоний номидаги малака ошириш институти хитой тили йўналиши бўйича қайта тайёрлаш курсларида бутунлай янгича услубни жорий этмоқда. Ўзбекистонда илк бор Абдулла Авлоний номидаги малака ошириш институтида умумий ўрта таълим мактабларида хитой тилини ўқитиш ҳуқуқини берувчи қайта тайёрлаш курслари ташкил этилди. Бу ҳақда Халқ таълими вазирлиги ахборот хизмати хабар берди.
Хитой тили қайта тайёрлов курслари контентлари, видеодарсларини тасвирга олишда ушбу тилни эгаси ҳисобланган “хитойлик келин” Ли Тинг билан ҳамкорлик ўрнатилди. Ҳамкорликнинг биринчи босқичи муваффақиятли якунланиб, 20 та видеодарс суратга олинган.
Келажакда “хитойлик келин” Ли Тингнинг А. Авлоний номидаги малака ошириш институти қайта тайёрлов курслари хитой тили йўналишида фаолият олиб бориши режалаштирилган.
Эслатиб ўтамиз, Сирдарё вилоятида тўсиқларга учраган Муроджон Кенжабаев ҳамда унинг турмуш ўртоғи Ли Тингга Халқ таълими вазирлиги эътибор қаратиб, “хитойлик келин”га мактабда хитой тилидан дарс ўтиш ҳуқуқини берувчи ўқув режа ва дастурларни ишлаб чиқишда ёрдам берган эди.
