Шавкат Мирзиёев давлат тилини янада ривожлантириш бўйича қўшимча чора-тадбирлар ҳақидаги қарорни имзолади.
Ҳужжатга кўра, 2026 йил 1 январдан бошлаб давлат органларининг марказий аппаратларида, республика миқёсидаги хўжалик бирлашмаларида, Қорақалпоғистон Республикаси Вазирлар Кенгашида, шунингдек, турли даражадаги ҳокимликларда раҳбарнинг маънавият ва давлат тили масалалари бўйича маслаҳатчиси лавозими жорий этилади.
Қайд этилишича, ушбу лавозим бошқарув ходимларининг белгиланган сони доирасида таъсис этилади.
Шу билан бирга, 2026 йилдан бошлаб она тилига яқин тилларда таълим оладиган мактаблар учун ўзбек тилидан янги авлод дарсликларини ишлаб чиқиш, мактабгача таълим муассасалари педагоглари учун услубий қўлланмалар тайёрлаш, болалар учун «Менинг илк изоҳли луғатчам» номли иллюстрацияланган изоҳли луғатни нашр этиш, шунингдек, ўзбек тилини ўргатишга қаратилган замонавий анимацион маҳсулотлар яратиш бошланади.
Маълум қилинишича, янги чора-тадбирлар ёш авлодда давлат тилига ҳурмат туйғусини шакллантириш ва халқаро тилшунослик ҳамкорлигини ривожлантиришга қаратилган.
Комментарии