Навоий вилоятида ичида 47 нафар йўловчи бўлган автобус ЙТҲга учрагани айтилган хабар ижтимоий тармоқларга сиздирилди. Ушбу хабар юзасидан Навоий вилояти ИИБ Матбуот хизмати изоҳ берди.
Унга кўра, жорий йилнинг 5 январь куни соат 7:40 атрофида Томди тумани "Томдибулоқ" ОФЙ ҳудудидан ўтган А-379 "Навоий-Учқудуқ" халқаро аҳамиятга молик автомобиль йўлининг 167-168 км.лари оралиғида йўл-транспорт ҳодисаси содир этилган.
Дастлабки суриштирувларга кўра салонида 47 нафар йўловчиси бўлган ZHONG TONG BUS русумли автобусни "Зарафшон-Навоий" йўналиши бўйлаб бошқариб бораётган 1986 йилда туғилган фуқаро Ш.Х. руль бошқарувини йўқотиб, йўналиши бўйича йўлнинг ўнг томонига чиқиб кетиб ағдарилиб, ЙТҲ содир этган.
Ҳодиса оқибатида йўловчи сифатида кетаётган 2 нафар фуқаро олган тан жароҳатлари сабабли воқеа жойида вафот этган. Турли кўринишдаги тан жароҳатлари олган 9 нафар фуқаролар тиббиёт муассасаларига ётқизилган.
Ҳозирда вазиятни тўлиқ ўрганиш, жабрланганлар ва уларнинг оила аъзоларига ёрдам кўрсатиш ҳамда оғир оқибатларга олиб келган шарт-шароитларга ҳуқуқий баҳо бериш мақсадида Навоий вилояти ИИБ томонидан воқеа тафсилотлари ўрганилмоқда.
Комментарии