Соғлиқни сақлаш вазирлиги бошқармаси бошлиғи Барно Aбдусамадова мамлакатда коронавирус инфекцияси дастлаб қайд этилганидан буён неча нафар ҳомиладор аёллар ушбу инфекцияга чалингани ҳақида маълумот берди.
Қайд этилишича, Ўзбекистонда 234 нафар ҳомиладор аёлда коронавирус аниқланган, 120 нафари соғайган. Ҳозирда 2,5 мингдан ортиқ ҳомиладор аёл карантин назоратига олинган.
Улардан 234 нафарида коронавирус инфекцияси тасдиқланган. Уларнинг 120 нафари соғайиб, уйига рухсат берилган. Шулар орасида 2,9% ҳолат ўлим билан тугаган.
Барно Aбдусамадованинг сўзларига кўра, касаллик оқибатида вафот этган ҳомиладор аёлларда семизлик, юрак қон-томир етишмовчилиги, нафар тизими касалликлари, буйрак касалликлари каби ҳамроҳ касалликлар кузатилган.
Вазирлик вакили келтирган расмий маълумотларга кўра, шу кунга қадар коронавирусга чалинган 7 нафар ҳомиладор аёл касаллик қурбони бўлган.
Маълумот учун, ҳомиладор аёл ва унинг ҳомиласига коронавирус инфекциясининг таъсири тўғрисида далилларга асосланган илмий хулосалар берилмаган.
Шунингдек, ҳомиладор аёллар коронавирус инфекциясига ва унинг асоратларига бошқалардан кўра кўпроқ мойиллиги борлиги тўғрисида ахборотлар ҳам йўқ.
