10 сентябрдан 11 сентябрга ўтар кечаси соат тахминан 00:50да Юнусобод туманида жойлашган кафеларнинг бирида икки хил даврада ўтирган йигитлар ўртасида можаро келиб чиққан. Бу ҳақида ИИББ хабар бермоқда.
Йигитлар ўзаро муаммони ҳал этиш учун кўчага чиқиб, Шайхонтоҳур туманига қараб йўл олган ва у ерда муштлашув келиб чиққан.
Натижада уч киши тан жароҳатлари билан касалхонага мурожаат қилган, улардан бири – 23 ёшли Муслимбек Омонов шифокорларнинг саъй-ҳаракатларига қарамай вафот этган.
Ҳолат юзасидан Жиноят кодексининг 104-моддаси 3-қисми «д» банди (“Жабрланувчининг ўлишига сабаб бўлган қасддан баданга оғир шикаст етказиш”) билан жиноят иши қўзғатилган.
Можаронинг барча иштирокчилари аниқланган. Тергов давом этмоқда.
Маълум-ки, Муслим Омонов К1 МС бўйича жаҳон чемпиони ва ММА бўйича Осиё чемпиони эди.
