Аввал хабар берганимиздек, 2019 йил 1 январдан Ўзбекистонда ОВИР стикери бекор қилиниб, хорижга чиқиш паспорти жорий этилди. Паспортнинг янги тури Вазирлар Маҳкамаси ҳузуридаги Давлат персоналлаштириш маркази томонидан 10 иш куни ичида тайёрланади. Паспортнинг амал қилиш муддати 10 йил.
Тошкент шаҳар ИИББнинг хабарига кўра, бугунги кунда пойтахтнинг 8000дан ошиқ фуқаролари хорижга чиқиш учун биометрик паспортни олиш учун ҳужжат топширишган.
2019 йилнинг 12 январидан ИИББ миграция ва фуқароликни расмийлаштириш бошқармасининг барча туман бўлимларида тайёр хорижга чиқиш паспортларини ўз эгаларига топшириш бошланган. Тантанали равишда топшириш маросимлари миграция ва фуқароликни расмийлаштириш бошқармасининг бир неча бўлимларида бўлиб ўтган.
