Ўзбекистон Бош давлат санитария врачининг кўрсатма хатига мувофиқ республика аҳолиси ўртасида коронавирус инфекциясига қарши иммунитетни ошириш мақсадида 2021 йил 17 ноябрь кунидан бошлаб тўлиқ вакцина курсини олган фуқаролар (2 ёки 3 маротаба эмланганлар) бустер доза билан ихтиёрий эмланади.
Коронавирус инфекциясига қарши иммунитетни оширувчи доза билан эмланиш тартиби қуйидагича:
— Бустер доза билан эмланувчи контингентга тўлиқ вакцина курсини олганига 6 ой ва ундан ортиқ вақт ўтган аҳоли киради;
— Бустер доза олмоқчи бўлган аҳоли Республиканинг барча даволаш профилактика муассасаларининг эмлаш пунктларида эмланиши мумкин;
— Эмлаш пунктида бустер дозани вакцинанинг ҳар қандай туридан фойдаланган ҳолда олиш мумкин.
Маълумот учун, ҳозирги кунга қадар 6 турдаги 42 млн 805 минг доза COVID га қарши вакцина келтирилди. Шунингдек йил охирига қадар 5,6 млн доза вакцина келтирилиши кутилмоқда.
