Осиё тараққиёт банки (ОТБ) Ўзбекистон ғарбидаги йирик шаҳар марказларини боғловчи 465 километрлик темир йўл линиясини электрлаштириш, темир йўл хизматларини яхшилаш ҳамда минтақада савдо ва туризмни ривожлантириш учун 162 миллион долларлик кредит ажратишни маъқуллади. Бу ҳақда банк Матбуот хизмати хабар бермоқда.
Лойиҳа ЮНEСКОнинг Хоразм вилоятидаги Бутунжаҳон мероси объектини боғловчи Бухоро, Мискин, Урганч ва Хива поезд йўлини электрлаштиради. Бу соатига 250 километр тезликда ҳаракатланувчи тезюрар поездларнинг ҳаракатланиши, Бухоро ва Хива ўртасидаги қатнов вақтини икки соатгача қисқартириш, пойтахт Тошкентдан Хивага етти соатда етиб бориш имконини беради.
“Ишончли ва хавфсиз транспорт инфратузилмаси иқтисодий ўсишнинг асосий омили ҳисобланади, Ўзбекистонда айниқса денгизга чиқиш имконияти бўлмаган", – деди ОТБнинг Марказий ва Ғарбий Осиё бўйича бош директори Евгений Жуков.
Қайд этилишича, бу поезд қатнови частотаси ва сифатини кенгайтириш орқали Ўзбекистоннинг қўшни давлатлар ва ундан узоқ давлатлар билан алоқа ва савдо алоқаларини яхшилашга ёрдам беради.
ОТБ, шунингдек, аёллар, болалар, қариялар ва ногиронлар учун хавфсизлик хусусиятларига эга поезд станциялари атрофида шаҳарларни ривожлантириш, электрон чипталар тизимини ишлаб чиқиш ҳамда аёлларни туризмни бошқариш бўйича ўқитиш ва жалб қилиш орқали лойиҳа ҳудудида туризм индустриясини ривожлантиришни қўллаб-қувватлайди.
“Бухоро-Хива” линияси электрлаштирилгач, йиллик йўловчи ташиш ҳажми жорий йилда 280 минг йўловчидан 2026 йилга келиб 1 млн йўловчидан кўпроққа ошиши, 2026 йилга бориб эса юк ташиш ҳажми йилига жами 11,8 млн тоннага етиши кутилмоқда.
Ҳукумат, шунингдек, Осиё инфратузилма инвестициялари банкидан 108 млн доллар миқдорида кредит сўраган. Буни банк бошқарув кенгаши маъқуллаган. ОТБ ушбу кредитни қисман бошқаради.
Қайд этилишича, ОТБ темир йўл операциялари ва бошқаруви бўйича танланган аёлларни ўқитиш каби асосий гендер тадбирларини қўллаб-қувватлаш учун 300 000 АҚШ доллари миқдоридаги техник ёрдам грантини тақдим этади.
