Қашқадарёда синглисига гап отган эркакни пичоқлаб ўлдирган аканинг бу иши судда кўриб чиқилди. Бу ҳақда вилоят ИИБ Матбуот хизмати хабар берди.
Маълум бўлишича, жорий йилнинг 22 март куни Косон туманида йигит бир эркакни синглисига гап отганликда гумонлар, уни алдов йўли билан учрашувга таклиф қилади.
Бунинг учун, у эркак билан гўёки қиз бола бўлиб Telegram'да гаплашган.
Ака ўзининг уч нафар қариндоши билан учрашувга боради. Машинадаги учрашув чоғида ака кутилмаганда эркакнинг бўйнига пичоқ санчади. Жабрланувчи бунга қаршилик кўрсатганида машинанинг орқа ўриндиғида ўтирган аканинг қариндошлари эркакнинг қўлларини ушлаб туришади.
Қизнинг акаси вазиятдан фойдаланиб, эркакнинг турли жойларига пичоқ санчиб, уни ўлдиради.
Шундан сўнг, улар марҳумга тегишли машинада қўшни қишлоққа боришиб, марҳумнинг жасади ва унга тегишли бўлган буюмларни ўша ерда яшовчи қариндошининг ҳовлисидаги қудуққа ташлаб юборишади.
Шунингдек, улар машинадаги 20 млн сўм пулни ишлатиб юборишади. Аниқланишича, марҳум уйланган ва унинг 3 нафар фарзанди бўлган.
Суд жиноятга доир ҳужжатларни кўриб чиқиб, иш бўйича якуний ҳукмни эълон қилди.
Эркакни ўлдирган акага нисбатан 19 йил, қолган уч шеригидан 2 нафарига 18 йил ва бир нафарига эса 2 йил муддатга озодликдан маҳрум қилиш жазоси тайинланди.
