Сеулда Ўзбекистон ФВВ эҳтиёжлари учун ёнғинга қарши 8 та махсус автомобиль, тиббий жиҳозлар ва ҳимоя воситаларини бепул топшириш маросими бўлиб ўтди. Бу ҳақда "Дунё" ахборот агентлиги хабар берди.
Маросимда мамлакатнинг Сеулдаги элчихонаси, Корея Миллий ёнғин хавфсизлиги хизмати, Корея-Ўзбекистон бизнес ассоциацияси ва Корея ёнғин хавфсизлиги ассоциацияси вакиллари иштирок этди.
2022 йил бошида белгиланган техникаларни Ўзбекистонга етказиб бериш режалаштирилган. Жанубий Корея томони ускуналарни топширишдан ташқари, Ўзбекистонда ҳам, Жанубий Кореяда ҳам ушбу ускунани ишлатиш бўйича ўқув курсларини ташкил этишни режалаштирган.
Қисқа вақт ичида Сеулдаги дипломатик ваколатхона кўмагида ёнғин хавфсизлиги соҳасида тажриба алмашиш, ҳамкорликда меморандум ишлаб чиқиш ва имзолаш мақсадида икки давлатнинг тегишли мутахассисларининг ўзаро ташрифлари ўтказилди.
Жанубий Корея томони билан Тошкент вилоятида ёнғин хавфсизлиги бўйича ўқув мажмуасини қуриш бўйича инвестиция лойиҳасини амалга ошириш масаласи ишлаб чиқилмоқда.
