Россиядан Ўзбекистонга жўнатилган бензинларни ўғирлаб кетганлар ушланди. Бу ҳақда Транспорт ва туризм объектларида хавфсизликни таъминлаш департаменти Матбуот хизмати хабар берди.
Аниқланишича, фуқаро Б.С., Ш.Д., Д.И. ва бошқа шахслар билан ўзганинг жуда кўп миқдордаги мулкини яширин равишда талон-торож қилиш мақсадида, олдиндан жиноий тил бириктириб, Россиянинг Орск шаҳри нефтни қайта ишлаш заводидан Тошкент шаҳри Сирғали 5-даҳасида жойлашган Carpe Diem Energy МЧЖ хорижий корхонасига юборилган 7 та цистерна вагонларга юкланган АИ-95 маркали бензин маҳсулотларини ўғирлаб, олиб кетиш учун вагонларнинг тепа қисмидаги «люки»га ўрнатилган тамғаларни кесишган.
Сўнг, вагонларнинг «люк»ларини очиб, маҳсулотни ўз бошқарувларида бўлган нефть маҳсулотларини ташишга мўлжалланган транспорт воситаларига юклаб, воқеа жойидан яширинган.
Мазкур ҳолат юзасидан Б.С. ва бошқаларга нисбатан ЖКнинг 169-моддаси (Ўғрилик) 4-қисми “а” банди билан жиноят иши қўзғатилиб, дастлабки тергов ҳаракатлари олиб борилмоқда.
