Ўзгидрометнинг хабар беришича, март ойининг охирги кунлари Ўзбекистон ҳудудига Эрондан илиқ ҳаво кириб келиши бошланди. Ушбу ҳолат апрель ойининг биринчи ҳафтасида ҳам давом этади.
Бугун, 1 апрель кундуз куни ва дам олиш кунлари Ўзбекистон ҳудуди бўйича асосан қуруқ ва жуда илиқ об-ҳаво бўлиши кутилмоқда. Кундуз кунлари ҳаво +20...+24 даражагача, баъзи жойларда +25...+28 даражагача исийди. Бу апрель ойи бошидаги кўп йиллик қийматлардан 4-6 даражага юқоридир.
Республика ҳудудининг катта қисмида ушбу кунларда асосан кам булутли ва қуруқ об-ҳаво бўлиши кутилмоқда.
Фақат Тошкент, Самарқанд, Жиззах вилоятларида, шунингдек, республиканинг тоғ олди ва тоғли ҳудудларида 2 апрель шанба куни ҳаво булутли бўлади. Куннинг иккинчи ярмида баъзи жойларда қисқа муддатли ёмғир ёғиши, момақалдироқ бўлиши мумкин.
