Тошкентда тунда бир нечта ҳайдовчилар дрифтлар қилишаётгани акс этган видео ижтимоий тармоққа сиздирилди. Тошкент шаҳар ИИББ Ахборот хизмати ушбу ҳолатга расмий баёнот берди.
Жорий йилнинг 17 апрель куни тахминан соат 22:30 атрофида Тошкент шаҳар, Юнусобод тумани, Истиқлол кўчасида бир нечта автомашиналар "дрифт" қилиб, хавфли вазиятни юзага келтиришган.
"Дрифт" қилиш оқибатида 1999 йилда туғилган М.Н. ўзига тегишли бўлган Nexia-3 автомашинасининг руль бошқарувини йўқотиб, йўл четидаги темир устунга урилиб тўқнашув содир этган.
Тўқнашув натижасида ҳеч ким жароҳат олмаган, лекин ушбу ҳолат бўйича ИИОга хабар бермасдан, ҳодиса жойидан кетиб қолган. Ҳолат юзасидан фуқаро М.Н.га нисбатан Тошкент шаҳар ИИББ ЙҲХБ ходимлари томонидан маъмурий баённома расмийлаштирилган.
Ҳуқуқбузарликни содир этган қолган автомашиналарни аниқлаш юзасидан суриштирув ишлари олиб борилмоқда.
