Академик лицейларда ҳам ўқишлар онлайн олиб борилади. Бу ҳақда бугун, 2 сентябрь куни АОКА ҳузуридаги штабда Олий ва ўрта махсус таълим вазирлиги матбуот котиби Фарҳод Бабашев иштирокидаги брифингда маълум қилинди.
Брифингда қайд этилишича, академик лицейларда фақат 1 ва 2-курс ўқувчилари таҳсил олади.
Шунингдек, академик лицейларда, олий таълим муассасалари сингари бугун, 2 сентябрдан расман ўқиш масофавий шаклда бошланди.
Вазирлик вакилининг маълум қилишича, академик лицейларда таълимни масофавий ёки анъанавий шаклда бошлаш бўйича ота-оналар ўртасида сўровномалар ўтказилган ва натижалар таҳлил қилинган.
Жорий йил 7-14 сентябрь кунлари академик лицейларнинг 1-курсига қабул қилиш бўйича тест синовлари ўтказилиб, натижалари эълон қилиниши билан таълим анъанавий ёки масофавий шаклда давом эттирилиши юзасидан қўшимча хабар берилади.
Аввалроқ, олий таълим муассасаларида 2 сентябрдан бошлаб 2020/2021 ўқув йили расман бошлангани маълум қилинганди.
