Янги ташкил қилинган Коррупцияга қарши курашиш агентлиги директори Акмал Бурхонов Telegram-каналида депутатлик ваколатлари тугатилгани ва "Адолат" СДП аъзолигидан чиққанини маълум қилди.
“Бугун Ўзбекистон Республикаси Марказий сайлов комиссияси қарори билан менинг Олий Мажлис Қонунчилик палатаси депутати сифатидаги ваколатим Агентликка директор этиб тайинланганим муносабати билан муддатидан аввал тугатилди.
Шунингдек, Агентликдаги иш фаолиятимга таъсир этмаслиги учун, хусусан, манфаатлар тўқнашувига йўл қўймаслик мақсадида Ўзбекистон "Адолат" социал-демократик партияси аъзолигини ҳам тарк этишга қарор қилдим”, деб ёзади у.
Эслатиб ўтамиз, 29 июнь куни Президент фармони билан Коррупцияга қарши курашиш агентлиги ташкил этилганди.
