49 ёшли ҳиндистонлик бизнесмен Шанкара Курхаде олтин ниқобдан фойдаланган ҳолда коронавирусдан ҳимоя қилишга қарор қилган. Тилла ниқоб буюртмага тайёрланган. Бунинг учун у 4 минг АҚШ доллари берган, дея хабар бермоқда Yahoo News.
Ниқобни тайёрлашга 8 кун ва 60 грамм олтин сарф қилинган. Ниқобда махсус тешиклар қолдирилган бўлиб, бу нафас олишга мўлжалланган. Унинг сўзларига кўра, бизнесмен ниқоб COVID-19дан самарали ҳимоя қилишига ишончи комил эмас, шу сабабли бошқа эҳтиёт чораларини ҳам кўришини маълум қилган.
Курхаде таъкидлашича, бундай ноёб ниқобни ясатишда унинг тилла буюмларга бўлган қизиқиши устунлик қилган. У кундалик тақиб юрадиган тилла буюмларнинг умумий оғирлиги нақ 1 килограмни ташкил қилади.
Тилладан ниқоб ясатиш ғояси унга ОАВ орқали бошқа одамнинг ўзига кумушдан ниқоб ясатганини ўқиганидан кейин келган.
Айни вақтда бу уни шаҳридаги энг машҳур инсонга айлантирган. Одамлар у билан селфи тушишни сўрашмоқда.
