26 март куни Ўзбекистоннинг Шанҳай шаҳридаги Бош консулхонаси мамлакатимиз фуқароси Мафтуна Ҳолматованинг ушбу шаҳар туманларининг бирида мажбуран ушлаб турилгани тўғрисида маълумот олиб, маҳаллий полиция ҳокимиятига расмий мурожаат қилган.
Натижада ҳамюртимизнинг жойлашган манзили аниқланиб, у билан консуллик ходимлари учрашди, дейилади ТИВ консуллик-ҳуқуқий департаменти хабарида.
Маълум бўлишича, Мафтуна Ҳолматова 2018 йилнинг июнь ойида Наманган шаҳридаги никоҳ агентлиги орқали ХХР фуқароси Яо Венхао билан танишган ҳамда ваъдаларига ишониб расмий никоҳни қайд этган, ва шундан сўнг Хитойга учиб кетган.
Унинг сўзларига кўра, етиб борганидан сўнг у оғир ижтимоий шароитда яшаган, унга овқат беришмаган, уришган, таҳқирлашган ҳамда паспортини олиб қўйишган. Бундан ташқари, у бир неча марта қочиб кетишга уринган.
Полиция бўлими бошлиғи иштирок этган суҳбатдан сўнг, Ўзбекистон фуқароси Бош консулхонага топширилган. 28 март куни Пекин шаҳри орқали учган авиарейсда у Тошкентга етиб келган.
