Ижтимоий тармоқда Сергели туманида йўловчи ташувчи автобус ёнаётгани акс этган видео тарқалди.
Ушбу ҳолат юзасидан туман фавқулодда вазиятлар бошқармаси Ахборот хизмати хабар берди.
Маълум бўлишича, бугун, соат 15:21 да Тошкент шаҳар Сергели тумани Дўстлик 1 даҳасида, 47-йўналиш бўйича ҳаракатланаётган автобусда ёнғин содир бўлганлиги тўғрисида туман ФВБга хабар келиб тушган.
Унга кўра, 2 та ўт ўчирувчи экипаж соат 15:25 да воқеа жойига етиб бориб, соат 15:34 да ёнғин бартараф этилган.
Ёнғин натижасида автобуснинг орқа салон қисми ёниб зарарланган. Ҳодиса оқибатида жабрланган ва ҳалок бўлганлар йўқ.
Ҳолат юзасидан мутахассислар томонидан ёнғин сабаби ва келтирилган моддий зарар миқдори аниқланмоқда.
