Аввалроқ, ижтимоий тармоқда "Бунёдкор" футбол клуби томонидан ходимларга икки ойлик иш ҳақлари тўлаб берилмаётганлиги ҳақида хабарлар тарқалди.
Меҳнат вазирлиги Матбуот хизматининг хабарига кўра, Тошкент шаҳар Давлат меҳнат инспекцияси томонидан ҳолат бўйича ўрганиш олиб борилган.
Аниқланишича, айни вақтда клуб томонидан жами 393 нафар ходимларга нисбатан октябрь ойи учун 1 млрд 532 миллион 216 минг сўм миқдоридаги ойлик маошлари тўлаб берилиши кечиктирилган.
Шунингдек, ҳозирда клуб ҳомийси "Ўзбекнефтгаз" АЖ томонидан маблағлар ажратилаётганлиги ва ходимларга ушбу тўловларни тўлаб бериш ҳаракатлари амалга оширилаётганлигини маълум қилди.
"Бундан ташқари, "Бунёдкор" футбол клуби бош директори У.А.Мирзаев номига ходимларга ойлик иш ҳақи бўйича юзага келган қарздорликни бартараф қилиш ҳамда кейинчалик ойлик иш ҳақларини ўз муддатида тўлаш бўйича Давлат меҳнат инспекцияси томонидан ёзма кўрсатма киритилди", - дейилади хабарда.
