2021 йил декабрь ойида жаҳон расмий олтин захиралари 14,2 тоннага ошди. Ой давомидаги умумий ўсиш Туркия ва Ўзбекистоннинг барқарор харидлари билан қўллаб-қувватланди, дейилади Жаҳон олтин кенгаши баёнотида.
Ўтган йилнинг декабрь ойида Ўзбекистон Марказий банки 8,4 тонна олтин сотиб олди ва шу тариқа қимматбаҳо металлнинг дунёдаги иккинчи йирик харидорига айланди. Олтин захиралари 2021 йил ноябрь ойида рекорд даражадаги 21,5 тонна олтин сотилганидан кейин тўлдирилди.
Қайд этилишича, бундай олди-сотди Ўзбекистон учун олтин захираларини фаол бошқараётгани учун одатий ҳолдир.
Энг йирик харидор 10,1 тонна олтин сотиб олган Туркия бўлди. Учинчи ўрин захирасини 3,7 тоннага оширган Ҳиндистонга насиб этди.
Декабрь ойида сотувлар марказий банкларнинг кичик гуруҳи ўртасида жамланган: Қозоғистон (4,8 тонна), Шри-Ланка (3,6 тонна) ва Польша (1,6 тонна).
