Андижондаги тергов ҳибсхонасида икки маҳбуслар муштлашиб, бири иккинчисини ўлдириб қўйди. Бу ҳақда ИИВ Матбуот котиби Шоҳрух Ғиёсов хабар берди.
Аниқланишича, жорий йилнинг 21 март куни соат тахминан 15:00 ларда ИИВ ҳузуридаги ЖИЭД 3-сон тергов ҳибсхонасида маҳбус М.С. камерада бирга сақланаётган маҳбус У.Ж. билан ўзаро жанжал оқибатида бир-бирларига тан жароҳатини етказишган.
Натижада, маҳбус М.С. олинган жароҳатлар оқибатида кўрсатилган тиббий муолажаларга қарамасдан вафот этган. Маҳбус У.Ж. эса муассасага қарашли касалхонада даволанмоқда.
Ҳолат юзасидан Андижон шаҳар прокуратураси томонидан ЖКнинг 104-моддаси (қасддан баданга оғир шикаст етказиш) 3-қисми “д” банди билан жиноят иши қўзғатилиб, тергов ҳаракатлари олиб борилмоқда.
