Тошкент 2029 йилда IV ёшлар Осиё ўйинларига мезбонлик қилади

Баҳрайнда бўлиб ўтган Осиё Олимпия кенгаши Ижроия қўмитаси 2029 йилги IV ёшлар Осиё ўйинларини ўтказишни Тошкентга топширишга қарор қилди.

Бу ҳақда бугун бўлиб ўтган III ёшлар Осиё ўйинларининг тантанали ёпилиш маросимида маълум қилинди.

Осиё Олимпия кенгашининг байроғини ёпилиш маросимида Ўзбекистон МОҚ раисининг биринчи ўринбосари Отабек Умаров расмий вакиллар қўлидан қабул қилиб олди.

Шундай қилиб, тўрт йилдан сўнг Ўзбекистон Осиё қитъасининг энг кучли ёш спортчилари ўртасида йирик мусобақалар ўтказиладиган майдонга айланади.

Ўтган йилнинг декабрь ойида Тошкентда бўлиб ўтиши керак бўлган Ёшлар ўртасидаги Осиё ўйинлари-2025 Баҳрайнга кўчирилгани ҳақида хабар берган эдик.

Баҳрайндаги мусобақани Ўзбекистон терма жамоаси 37 та олтин, 16 та кумуш ва 28 та бронза медали билан якунлаб, Хитойдан кейин иккинчи ўринни эгаллади.