Ўзбекистон терма жамоаси Халқаро футбол федерацияси рейтингида пастлади

ФИФАнинг 19 январь куни янгиланган рейтингига кўра, Ўзбекистон миллий терма жамоаси 1462,03 балл билан икки поғона пастлади.

Айни вақтда Ўзбекистон миллий терма жамоаси Коста-Рика (51) ва Перу (53) ўртасида 52-ўринни эгаллаб турибди.

Осиё футбол конфедерацияси рейтингида миллий терма жамоа 5-ўринни эгаллади. Рейтингда Япония, Эрон, Жанубий Корея ва Австралия миллий терма жамоалари юқори ўринларни эгаллаган.

Марказий Осиё давлатлари орасида Ўзбекистон миллий терма жамоаси етакчилик қилмоқда. Кейинги ўринларда Тожикистон (100), Қирғизистон (103), Қозоғистон (114) ва Туркманистон (137) бормоқда.

Жаҳон рейтингида Испания, Аргентина ва Франция терма жамоалари етакчилик қилмоқда.