Интернет тармоқларида эркак киши томонидан Учтепа туманидаги "Ал-Хилал" кафеси ёнида олинган видео тарқалди. Видеода ёш аёл 3-4 ёшли қизини ураётгани акс этган.
Видеога олган эркакнинг нима учун болани ураётгани ҳақидаги саволига аёл қуйидагича жавоб берган: "Менинг болам - нима истасам, шуни қаламан. Хоҳласам - ўлдираман!" Аёлнинг сўзларига кўра, у қизчани бошқа боласини уйғотиб юборгани учун урган.
Эркак кишининг айтишича, у аёлдан бундай қилмасликни сўраган, лекин аёл ҳаракатларини тўхтатиш ҳақида ўйлаб ҳам кўрмаган.
Тошкент шаҳар ИИББнинг хабар беришича, мазкур ҳолат эътиборсиз қолдирилмайди.
"Аёлни излашяпти. Унинг салбий ҳаракатлари сабаби аниқлаштирилади. Аёл дуч келган сабабларни аниқлаш мақсадида, ишга катталар ва болалар психологи ҳамда аёллар масаласи бўйича инспектор жалб қилинади", - дейилади хабарда.
