Бухорода эркак аёлини пичоқлаб ўлдирди. Бу ҳақда вилоят ИИБ Матбуот хизмати хабар берди.
Жорий йилнинг 27 ноябрь куни тахминан соат 12:00 ларда Ғиждувон тумани Зарангари маҳалласида яшаган 1978 йилда туғилган Р.Н. ва унинг турмуш ўртоғи 1975 йилда туғилган Р.З. лар ўзлари истиқомат қилиб келаётган хонадонда ўзаро келишмовчилик сабаб жанжаллашиб қолишган.
Жанжал вақтида Р.З. ўз аёлини ошхона пичоғи билан чап кўкрак қафаси юқори қисмига бир маротаба уриб, оғир тан жароҳати етказган. Натижада, аёл вафот этган.
Суд тиббий экспертизанинг дастлабки маълумотига кўра, марҳума Р.Н. ўткир санчиб кесувчи жисм таъсирида чап кўкрак юқори қисмидан олган жароҳати оқибатида келиб чиққан ўткир ички ва ташқи қон кетиши билан вафот этганлиги аниқланган.
Ҳолат юзасидан судга оид тиббий, криминалистика ҳамда биология экспертизалар тайинланган бўлиб, туман прокуратураси томонидан фуқаро Р.З.га нисбатан ЖК.нинг 97-моддаси 1-қисми билан жиноят иши қўзғатилган ва гумон қилинувчи ЖПКнинг 221-моддаси тартибида ушланган.
