Аввалроқ бир қатор маҳаллий Telegram-каналларда ҳукумат жорий йилнинг 1 апрелигача товуқ тухумини экспорт қилишни тақиқлагани ҳақида хабарлар тарқалганди.
Мазкур хабарларда айтилишича, бундай ташаббус Иқтисодий тараққиёт ва камбағалликни қисқартириш вазирлиги ҳамда Қишлоқ хўжалиги вазирликлари томонидан ички бозорда нархларни барқарорлаштириш мақсадида илгари сурилган. Шу сабабдан фермер ва тадбиркорлар катта молиявий муаммоларга дуч келишган.
Ветеринария ва чорвачиликни ривожлантириш давлат қўмитаси берган маълумотга кўра, тухум экспортига оғзаки ва ёзма равишда тақиқ қўйилмаган.
"Тухум экспорт қилувчи тадбиркорга нисбатан тухум импорт қилувчи мамлакатларнинг меъёр ва қоидаларига мувофиқ қўмита томонидан ҳеч қандай чекловлар қўйилмаган", - дейилади қўмита хабарида.
Тухум экспорти жараёнларига қизиққан фуқаролардан маълумот олиш учун "Паррандасаноат"га мурожаат қилишлари тавсия этилди.
