Украина президенти Владимир Зеленский Россия президенти Владимир Путиннинг Донецк Халқ Республикаси ва Луганск Халқ Республикалари мустақиллигини тан олиши ҳақидаги қарори фонида украиналикларга мурожаат қилди.
"Тарихий узоқ маърузалар ўқишга вақтимиз йўқ. Мен ўтмиш ҳақида гапирмайман, бугун ва келажак ҳақида гапираман. Украинанинг халқаро тан олинган чегаралари аввалгидек қолади. Биз хотиржам ва ўзига ишонган давлат бўлиб қоламиз. Тунни уйқусиз ўтказишингиз учун ҳеч қандай сабаб йўқ”, - деди Украина президенти Владимир Зеленский.
Унинг таъкидлашича, Россиянинг охирги ҳаракатлари мамлакат суверенитетини бузишдир. ДХР ва ЛХРни тан олиш Россиянинг Минск келишувларидан бир томонлама чиқиб кетишини англатади.
"Россия 2014 йилдан бери Донбасснинг босиб олинган ҳудудларида ўз қўшинларига эга. 8 йил давомида урушни қўллаб-қувватлаган давлат, ўзи айтганидек, тинчликни сақлай олмайди.
Биз ўз юртимиздамиз, ҳеч нарсадан, ҳеч кимдан қўрқмаймиз. Биз ҳеч кимдан қарздор эмасмиз, ҳеч кимга ҳеч нарса бермаймиз. Бунга ишончимиз комил, чунки ҳозир 2014 йилнинг феврали эмас, балки 2022 йилнинг феврали. Бошқа давлат, бошқа армия, битта мақсад. Бу - Украинада тинчлик! Украинага шон-шарафлар!", - деди Владимир Зеленский.
