Жиноят кодексининг 168 ва 169-моддалари банк пластик карталардан пул маблағларини ўғирлик йўли билан талон-торож қилганлик учун оғирлаштирувчи ҳолат сифатида жавобгарликни белгиловчи янги норма билан тўлдирилмоқда. Бу ҳақда Олий Мажлис Қонунчилик палатасининг навбатдаги мажлисида маълум қилинди.
Бугунги кунда банк пластик карталардан пул маблағларини ўғирлик йўли билан талон-торож қилиш ҳолатлари Жиноят кодексининг 169-моддаси (ўғрилик) билан малакаланади.
Эътиборли жиҳати, кўп ҳолларда фуқароларнинг банк пластик карталардан оз миқдорда талон-торож қилинаётгани сабабли ушбу қилмиш Жиноят кодекси 169-моддасининг 1-қисми билан айб эълон қилинади. Бу ўз навбатида, айбдор шахсларга нисбатан етарлича жазо чораларининг қўлланилмаётганига, уларнинг ахлоқан тузалиш йўлига ўтмаётганига, такроран жиноий фаолият билан шуғулланишига олиб келмоқда.
Қонун лойиҳаси депутатлар томонидан қабул қилинди.
