Йўловчи хавфсизлик камарини тақмаса, жаримани ҳам ўзлари тўлайди. Бу ҳақда ИИВ вакили Азиз Раҳматуллаев АОКАда бўлиб ўтган матбуот анжуманида маълум қилди.
Ўзбекистонда 1 майдан бошлаб автомобилнинг олд ўриндиғида ўтирган йўловчилар хавфсизлик камарини тақиб олишлари шарт бўлади.
"Агар йўловчи хавфсизлик камарини тақмаса, у ҳуқуқбузарлик субъекти ҳисобланади. Йўловчига нисбатан маъмурий баённома расмийлаштирилиши кўзда тутилган", - деди у.
Таъкидланишича, жарима миқдори БҲМнинг ярмини, яъни 135 минг сўмни ташкил этади. Худди шундай жазо МЖтКнинг 125-моддаси 1-қисмига мувофиқ ҳайдовчига ҳам назарда тутилган. Ушбу кодексга йўловчиларнинг жавобгарлиги бўйича ҳали ўзгартиришлар киритилмаган.
