Ўзбекистонда 2026 йилги «Ташаббусли бюджет» дастурининг биринчи мавсуми 1 февралдан бошланади. Бу ҳақда Иқтисодиёт ва молия вазирлиги матбуот хизмати маълум қилди.
Қайд этилишича, жорий йилги мавсум“Ташаббускор халқ учун — янги имкониятлар мавсуми” шиори остида ўтказилади ҳамда дастур жорий этилганидан буён ўнинчи, юбилей мавсум ҳисобланади.
Тадбирлар жадвали қуйидагича:
— 1–20-февраль кунлари лойиҳаларни киритиш;
— 21 февралдан 7 мартгача лойиҳаларни саралаш;
— 8–10 март кунлари тарғибот босқичи;
— 11–20 март кунлари овоз бериш босқичи;
— 21–31 март кунлари қўшимча ғолибларни эълон қилиш босқичи ўтказилади.
Маълумот учун, анъанавий овоз бериш босқичи якунларига кўра ғолиб лойиҳалар 21-март — Наврўз байрами куни эълон қилинади.
Қўшимча ғолиб лойиҳалар қуйидаги тартибда аниқланади:
- туман (шаҳар) халқ депутатлари Кенгашлари депутатлари — туман бюджети ҳисобидан етишмаётган маблағни ажратиш орқали;
- Олий Мажлис Қонунчилик палатаси депутатлари — ғалаба қозонмаган лойиҳалар орасидан биттасини танлаш орқали.
Қўшимча лойиҳаларни танлаш мезонлари:
- лойиҳа тегишли сайлов округи ҳудудида жойлашган бўлиши;
- овоз бериш босқичидан ўтиб, камида 50 та овоз тўплаган бўлиши;
- лойиҳа ҳамкорлик асосида молиялаштирилаётган маҳаллага тегишли бўлмаслиги.
Шунингдек, бир маҳалладан кетма-кет икки мавсумда депутатлар томонидан лойиҳа танлашга йўл қўйилмайди. Агар белгиланган мавсумда депутатлар ўз ҳуқуқидан фойдаланмаса, бу кейинги мавсумларда мазкур ҳуқуқни қўллаш имконини бермайди.
2026 йилдан жорий этиладиган асосий ўзгаришлар:
- лойиҳани ғолиб деб топиш учун минимал овозлар сони 50 та этиб белгиланди (аввал — 10 та);
- жиҳозлашга оид лойиҳалар учун энг юқори қиймат 2000 БҲМ этиб белгиланди (аввал — 4000 БҲМ).
Изоҳ