Ўзбекистон ва Полша Интерпол ходимларининг ҳамкорликдаги саъй-ҳаракатлари туфайли йирик миқдордаги фирибгарлик учун қидирувда бўлган жиноятчи ушланди ва Ўзбекистонга экстрадиция қилинди, дея хабар бермоқда ИИВ Матбуот хизмати.
Интерполнинг Ўзбекистондаги Миллий марказий бюроси ходимлари томонидан фирибгарлик жиноятини содир этганлиги учун халқаро қидирувда бўлган жиноятчини экстрадиция қилиш жараёни амалга оширилди.
"Интерполнинг Тошкент ва Варшава Миллий марказий бюроларининг ўзаро ҳамжиҳатликдаги ҳамкорлиги туфайли Полшада Интерполнинг Қизил хабарномаси фигуранти сифатида ҳибсга олинган, ҳуқуқни муҳофаза қилувчи органларимиз томонидан фирибгарлик учун қидирилаётган жиноятчи Ўзбекистонга топширилди," - дейилади хабарда.
Олинган маълумотларга кўра, жиноятчи Европа Иттифоқи мамлакатлари ҳудудида яширинган, шу сабабли тезкор-қидирув тадбирлари давомида у Полша ҳудудида аниқланган ва қўлга олинган.
Тошкент ва Варшава Интерпол ММБнинг биргаликдаги ҳаракатлари натижасида қидирувдаги шахс аниқланиб, қўлга олинган.
Ўзбекистон Бош прокуратурасининг экстрадиция қилиш тўғрисидаги илтимосномаси қаноатлантирилгандан сўнг, Интерпол ходимлари ҳамроҳлигида ва Ўзбекистоннинг Полшадаги дипломатик ваколатхонаси вакиллари кўмагида жиноятчи суд олдида жавоб бериш учун Ўзбекистонга олиб келинди.
Изоҳ