Жорий йилнинг 1 июль куни соат 20:50 атрофида Андижон вилояти Хўжаобод тумани "Юксалиш" маҳалласидаги хонадонда жанжал бўлаётганлиги ҳақида ИИОга хабар келиб тушган. Хабар бўйича ҳудуд профилактика инспектори ва маҳалла раиси билан бирга воқеа жойига етиб боришган.
Аниқланишича, 1960 йилда туғилган фуқаро Х.Ю. маст ҳолда ўз оила аъзоларига хўжалик пичоғи билан таҳдид қилаётган бўлган. Фуқарони зарарсизлантириш жараёнида Х.Ю. қўлидаги пичоқ билан катта лейтенантнинг кўкрак қисмига зарба бериб, оғир тан жароҳати етказган.
ИИО ходими олган тан жароҳати натижасида кўрсатилган ёрдамга қарамасдан шифохонага олиб кетилаётган вақтида вафот этган.
Ҳолат юзасидан ЖКнинг 97-моддаси 2-қисми "г" банди билан жиноят иши қўзғатилган. Ҳозирда гумондор Х.Ю. воқеа жойидан яширинган, уни аниқлаш ва қўлга олиш бўйича тезкор-қидирув тадбирлари амалга оширилмоқда.
"Ҳалок бўлган Андижон вилояти Хўжаобод тумани ИИБ профилактика инспектори катта лейтенант Абдувалиев Абдурасул Қахаровичнинг оила аъзолари ва яқинларига чуқур таъзия билдирамиз," - дейилади хабарда.
Изоҳ