Ҳокимлик Оҳангарондаги жамоат ҳожатхонасининг шаффоф эшиги билан боғлиқ вазиятга изоҳ берди - видео

Ижтимоий тармоқларда шаффоф ойнали жамоат ҳожатхонаси акс этган видео тарқалиб, жамоатчилик эътирозига сабаб бўлди.

Маълум бўлишича, видеоролик Тошкент вилояти Оҳангарон шаҳри ҳудудида жойлашган ёқилғи қуйиш шохобчаларидан бирида тасвирга олинган.

"Юзага келган ҳолатга техник носозлик сабаб бўлиб, тасвирга олишдан бир кун олдин ҳожатхонанинг кириш эшиги ойнаси синган, шундан сўнг унинг ўрнига зудлик билан янги ойна ўрнатилган," - дейилади шаҳар ҳокимлиги хабарида.

Қайд этилишича, ички ва ташқи бўшлиқнинг кўринишини чеклаш мақсадида ушбу ойнага махсус ёруғлик ўтказмайдиган плёнка ёпиштириш режалаштирилган. Видео ушбу жараён тугашидан олдин суратга олинган.

Маълум қилинишича, ҳозирда носозлик бартараф этилиб, ҳожатхонанинг кириш эшиги ойнасига тегишли плёнка ўрнатилган ва ундан фойдаланиш учун барча зарур шароитлар таъминланган.