Тошкент шаҳрида жамоат транспортида аёлга нисбатан шаҳвоний шилқимлик қилган эркак 15 суткага маъмурий қамоқ жазосига тортилди. Бу ҳақда жиноят ишлари бўйича Бектемир тумани суди қарорида маълум қилинган.
Суд ҳужжатларига кўра, 1976 йилда туғилган T.C. 23 июнь куни соат 07:45 атрофида Бектемир тумани ҳудудида ҳаракатланаётган 93-йўналишли автобусда ёнида ўтирган аёлга нисбатан номақбул ҳаракатлар қилган. У аёлнинг қўлига тегиниб, сўнг жинсий аъзосини очиқ ҳолда кўрсатган.
Қайд этилишича, жабрланувчи бақириб ёрдам сўраганидан кейин эркак автобусдан қочиб чиқишга уринган. Ҳайдовчи эшикларни ёпиб қўйгач, у жанжал кўтариб, эшикларни тепиб очишга ҳаракат қилган ва ҳақоратли сўзлар ишлатган.
Шунингдек, воқеа жойига келган ички ишлар органлари ходимларининг қонуний талабларига бўйсунмай, уларга қаршилик кўрсатган.
Суд мажлисида Т.С. айбига тўлиқ иқрор бўлиб, воқеа вақтида маст ҳолатда бўлганини билдирган. У қилган ишидан пушаймон эканини айтган ва жабрланувчидан кечирим сўраган.
Суд уни шаҳвоний шилқимлик, майда безорилик ҳамда ҳуқуқни муҳофаза қилувчи орган ходимларининг қонуний талабларига бўйсунмасликда айбдор деб топди. Қарорга мувофиқ, унга 15 сутка маъмурий қамоқ жазоси ҳамда 2 млн 60 минг сўм жарима тайинланди.
Изоҳ