Таиланднинг Паттайя шаҳрида бедарак йўқолган россиялик ака-сингил — 22 ёшли Диана Назимова ва унинг 17 ёшли укаси Роман Назимованинг ўлдирилишида гумонланаётган Таиланд фуқаролари жиноят сабабини маълум қилди.
Thairat нашрининг ёзишича, гумонланувчилар сўроқ вақтида Назимовларни уларнинг мотоциклини қўлга киритиш мақсадида ўлдирганини тан олган.
Маълум бўлишича, Диана ва Роман 26 июль куни тонг соат 04:00 атрофида мотоциклда уйдан чиқиб кетган. Орадан 20 дақиқа ўтгач, Бангкокда бўлган онасининг телефонига Дианадан фақатгина "Urgent!" ("Шошилинч!") деган сўздан иборат хабар келиб тушган. Шундан кейин ака-сингил билан алоқа узилган.
Тергов давомида кузатув камералари ёзувлари ўрганилиб, уларнинг яшаш манзилидан автомобиль йўли томон ҳаракатлангани аниқланган. Кейинчалик Назимовларга тегишли мотоцикл трассадан 200 метр узоқликдаги ўрмон ҳудудидан кўмилган ҳолда топилган.
Ака-сингилнинг ўлдирилиши ортидан Таиланд ҳукумати мамлакатда туристлар хавфсизлигини кучайтириш чораларини кўришга киришди.
Таиланд ташқи ишлар вазири Сихасак Пхуангкеткео ушбу ҳодиса бутун мамлакат учун оғир зарба бўлганини таъкидлади. Унинг сўзларига кўра, Таиланд бош вазири ҳамда ташқи ишлар вазирлиги дарҳол Россиянинг Таиланддаги элчиси билан боғланиб, ҳамдардлик билдирган.
Вазирнинг қайд этишича, бу жиноят Таиланднинг машҳур сайёҳлик йўналиши сифатидаги обрўсига ҳам салбий таъсир кўрсатган. Шу муносабат билан бош вазир Анутхин Чанвиракун полицияга айбдорларни тезкорлик билан жавобгарликка тортиш ва келгусида бундай жиноятларнинг олдини олиш бўйича барча зарур чораларни кўришни топширган.
Изоҳ