Жума куни бўлиб ўтган йиғилишда давлат раҳбари ректорларнинг ваколатларини кенгайтириш ва масъулиятини кучайтиришни назарда тутувчи янги тизим жорий этиш зарурлигини таъкидлади.
Энди "Янги Ўзбекистон" университетида қўлланилаётган баҳолаш тизими бошқа олийгоҳларда ҳам жорий этилади. Олий таълим муассасаларини молиялаштириш уларнинг тўплаган балларига қараб амалга оширилади.
Хусусан, ОТМларга қуйидагилар қўшилади:
• 40 балл - битирувчиларни ишга жойлаштирганлик учун;
• 30 балл - илмий тадқиқотлар ва уларнинг маҳсулотларини сотиш бўйича тармоқ буюртмаларини бажарганлик учун;
• 20 балл - илмий салоҳияти, шу жумладан тан олинган халқаро журналлардаги мақолалари учун;
• 10 баллгача - тадқиқотларга маҳаллий ва хорижий грантларни жалб қилганлик учун.
Масалан, Қарши техника университети тўплаши мумкин бўлган баллнинг 85 фоизини тўпласа, бу йил бюджетдан 78 миллиард сўмдан ташқари яна 20 фоиз қўшимча бонусга эга бўлади. 56 фоиздан кам тўпласа, кейинги ўқув йили учун молиялаштириш қисқартирилади.
Шунингдек, Миллий университет, Ирригатсия университети каби илмий, Маданият ва санъат университети ёки Консерватория каби ижодий олийгоҳларни амалий техника олийгоҳлари билан тенглаштириш мумкин эмаслиги қайд этилди.
Мутасаддиларга рейтинг мезонларини ишлаб чиқишда ушбу хусусиятни инобатга олиш топширилди.
Изоҳ